تورکون دیلی تک سئوگیلی ایسته کلی دیل اولماز
اؤزگه دیله قاتسان بو اصیل دیل اصیل اولماز
اؤز شعرینی فارسا – عربه قاتماسا شاعیر
شعری اوخویانلار ، ائشیدنلر کسیل اولماز
فارس شاعري ، چوخ سؤزلريني بيزدن آپارميش
صابر كيمي بير سفره لي شاعر ، بخيل اولماز.
توركون مثلي ، فولكلورو دونيادا تك دير
خان يورقاني ، كند ايچره مثل دير ، ميتيل اولماز.
آذر قوشونو ، قيصر رومي اسير ائتميش
كسرا سؤزودور ، بير بئله تاريخ ، ناغيل اولماز.
پيشميش كيمي شعرين ده گرك داد - دوزو اولسون
كند اهلي بيليرلر كي دوشاب سيز خشيل اولماز.
سؤزلرده جواهر كيمي دير ، اصلي - بدلدن
تشخيص وئرن اولسا ، بو قده ر ، زير - زيبيل اولماز.
شاعر اولا بيلمزسن ، آنان دوغماسا شاعر
مس سن ، آبالام هر ساري كؤينك قيزيل اولماز.
چوخ قيسا بوي اولسان اولورسان جن كيمي شيطان
چوخ دا اوزون اولما كي اوزوندا عقيل اولماز.
مندن ده نه ظالم چيخار اوغلوم ، نه قصاص چي
بير دفعه بونو قان ، كي ايپكدن قزيل اولماز.
آزاد قوي اوغول عشقي طبيعتده بيلينسين
داغ - داشدا دوغولموش دلي جئيران ، حميل اولماز.
اينسان اودو توتسون بو ذليل خلقين اليندن
آللاهي سئورسن ، بئله اينسان ذليل اولماز.
چوخ داكي سرابين سويووار ، ياغ - بالي واردير
باش عرشه ده چاتديرسا سراب ، اردبيل اولماز.
ملت غمي اولسا ، بوجوجوقلار چؤپه دؤنمز
اربابلاريميزدان دا قارينلار طبيل اولماز.
دوز واختا دولار تاختا - تاباق ادويه ايله
اوندا كي ننه م سانجيلانار ، زنجفيل اولماز.
بو شهريار ين طبعي كيمي چيممه لي چشمه
كوثر اولا بيلسه دئميرم ، سلسبيل اولماز.